Is còzusu de Santu Mattĩu 'e Arriora

estratto dal libro "Goggius" del Sacerdote riolese Giovanni Sechi (raccolta completa di lodi sacre in lingua sarda)

SAN MARTINO Vescovo Patrono di Riola

___________

I.

Taumaturgu prodigiosu

De sos eregios terrore

Martinu Santu gloriosu

Siades nostru intercessore.

1- In Sabarìa fistis nadu
De idolatras paganos
In edade de pagos annos
Tant’amenu fist istadu;
Fidel’hazis cunservadu
Su virginale candore.

2 - Pro sa santa idolatria
Babbu ostru appassionadu
Dogni mediu hat impleadu
Pro bos ponner in porfia
Sa fide chi professaia
De s’Eternu Redentore.

3 - Ipse si sforzat invanu
De bos poder deviare
A Christos de adorare
Militende cun Giulianu,
Ma costante e fittianu
Servestis a su Signore.

4 - Intrende in d’una cittade
Non ancora battizzadu,
A unu poveru ispozadu
Chi bos dimandat caridade
De sa veste sa metade
Li destis cun grande amore.

5 - De sa propria rivestidu
Intro sa notte sighente
Bos cumparet s’Onnipotente
De anghelos circuidu
Chi hat tantu applaudidu
Cuss’eroicu favore.

6 - In edade ‘e degheott’annos
Bos fetistis battizare
Determinad’è lassare
Su mundu cun sos ingannos
De perfettos cristianos
Bos fettende imitadore.

7 - De sa milizia esentadu
De sos potentes de sa terra
Fatestis un’aspra gherra,
A su corpus delicadu
E gasi mortificadu
Avanzestis cun piùs fervore.

8 - Ritiradu in su desertu
Cun grandes austeridades
Su camminu praticades
De virtudes su piùs certu
Ca de veras sezis fertu
Cun fleccias de santu amore.

9 - Viudada de preladu
Sa cittade de Turrone
De s’umile religione
Ue fistis ritiradu
Bos elevat a su gradu
D’esserli babbu e pastore

10 - Non appenas elevadu
A unu gradu tantu mannu
A destruire s’ingannu
S’impignu bostru est istadu
Fin a bider atterradu
Dogni ereticu furore.

11 - Seduttu Valentinianu
Dae sa muzere Giustina
Contra sa lee divina
A difender s’arianu
Persighit su cristianu
Cun edittos de rigore.

12 - Ma s’umana nobilesa
A una prova tantu dura
De s’anima tottu pura
In abbatter sa firmesa
E a trattare est arresa
Attazianu pro timore.

13 - Non appenas hat connotu
Su male chi hat operadu
Chi contritu e umiliadu
Su coro sou de unu tottu
Pianghet senza cunfortu
Pro purificare s’errore.

14 - De arianos circundadu
Su superbu regnante
Si bettad Martinu anante
Ch’invisibile est intradu
Attordidu e ispantadu
Cambiat s’ira in amore.

15 - Cust’eroe celestiale
S’infiammat de santu fogu
E penetrat in su logu
De su tronu imperiale
E cun boghe angelicale
Riprendet s’imperadore.

16 - Bos ispirat s’Onnipotente
Predicare a babbu ostru
Ma ribelle e indispostu
Morit ipse impenitente,
Mamma ostra piùs prudente
Abbandonesit s’errore.

17 - De predicare abbattidu
E de s’aspera penitenza
Ma piùs de sa veemenzia
De s’amore già finidu
Si preparat a su cumbidu
De s’Eternu Salvadore.

18 - Sende in s’ultim’agonia
De custa vida mortale
Cudd’ispiritu infernale
Si presentat cun osadìa
Pro lu tenner in cumpagnia
In s’infernale rigore

19 - Appenas lu iet intradu
Li narat già moribundu:
Bae bestia a su profundu
De s’inferru cundennadu;
Nende custu est ispiradu
In bratzos de su Signore.

20 - Appenas fistis ispiradu
Cun resones uguales,
De sos coros angelicales
Sezis bois disizadu
De bos tennes collocadu
In s’eternu resplendore

21 - Già chi tanta caridade
Sende in vida os infiammada
Dade nos una mirada
Dae su chelu cun piedade,
De male nos liberade,
Nos siades protettore.

Già chi in chelu gloriosu
Regnades cun su Signore
Martinu santu gloriosu
Siades nostru intercessore.